Tʋ "bo ‑mɔ ‑nyɩ" ‑aʋn pɛe 'a blua'
85
'Dʋ ‑jeopoi klaa" Kore 'a "nynuu‑ 'a 'dʋ.
2 Tʋ "bo, ɛ ‑sa Sakɔbʋ 'a nynuu‑ kʋɔn 'kwla ɛ je ʋʋpʋ‑ de ja.
3 Ɛ ‑kɔ' ɛɛ' 'bleʋn 'a dɛsaʋn 'mɛ.
Ɛ 'mʋʋɛ ʋʋa' dɩsaɩn ‑wee'‑ "klein "kpei ɩ ‑kwɛ'. ‑Te' ‑kwlʋ
4 Ɛ 'wla ɛɛ 'cɛn ‑wee'‑ "klein 'mɛ,
'cɛn ɛ ‑jeɛ "i ‑sii 'deɛ, ɛ blɛ ɛ poɛ 'de.
5 Ɛ ja ‑aʋn 'de ‑aa ‑kɔo de,
Kea ‑nɩa‑ ‑aa 'pʋʋ i ɛ, ɛ‑ nynaa ɛɛ' 'cɛn i.
6 Ɛ 'je ‑a 'cɛn i 'kpaa mamaʋ 'sʋ?
Ɛɛ' 'cɛn se "ti ‑ta 'ble i jeejee?
7 Ɛ se ‑aʋn 'kmʋnɩa ‑mɛ "nyɩ i ‑wee'‑
‑wɛe ɛɛ' 'cɛ se 'mʋa‑ nʋ i?
8 'Oo Tʋ "bo,
ɛ to ɛɛ' nyʋ 'a ‑tɩ' kmaa' ‑a ‑jeɛ 'je, ɛ 'pʋʋ ‑aʋn.
9 'Ma muɛ dɛ Tʋ "bo Kea 'tmʋa doun" o po 'a;
Tʋ "bo a 'tmʋɛ pɛɛ 'a blu ‑tɩ 'de nyʋ ‑ʋʋa ‑tɩ' ɛ kma ‑pee,
‑bo ʋʋ se ʋʋa' dɩ ʋʋ nʋa 'di de blu ɛ.
10 Kɩɩn, nyʋ ‑ʋʋa ‑tea' ɛɛ' ni' ɛɛ muɛ ‑mʋ ‑wi" pʋʋa',
‑wɛe ɛɛ' Tʋ"bodɛ 'je ‑aa 'blʋa 'di "ti.
11 Nyʋ 'a ‑tɩ' kmaa' ke 'diwɔnmɔa' a muɛ ‑gbʋʋan';
"isrɛa' ke pɛe a blua' ‑gbleeɛ ba ‑kwlɩ".
12 Wlu "kpei kpʋan' 'a mɛ' 'de 'blʋa "kpei,
‑wɛe "isrɛa' a 'wlʋ 'de jaʋn ‑kwlʋ ɛɛ "sii.
13 Tʋ "bo 'a ‑cɛ" ɛ muɛ ‑a ‑pɔia" "nyɩa,
‑wɛe ‑aa 'blʋa 'je ‑aʋn ɛɛ' croo dɩ "nyɩ.
14 "Isrɛa' a muɛ ɛ "juɛi kɔan', ‑wɛe ɛ 'je ‑jeblʋ po.